Kærustovnurin: Lógligt at læsa barn inni í einarúmi á stovni

Fyri fyrstu ferð viðgjørdi Kærustovnurin í fjør eina kæru um tvingsil í barnaverndarlógini og tvingsilslógini.

Málið var um ógvisliga bráðfeingisstøðu á stovni, sum barnaverndin brúkar.

Starvsfólkini avgjørdu at læsa barn inni í einrúmi fyri at verja starvsfólk, onnur børn og barnið sjálvt.

Serlig fyriskipan í kjallaranum

Serlig fyriskipan var gjørd í kjallaranum á stovninum, har barnið búði.

Hendan fyriskipanin var í gildi í meira enn tríggjar mánaðir. 

Niðurstøðan hjá Kærustovninum var, at talan var um ógvisliga hending, har starvsfólkini vóru sett í avbjóðandi støðu.

Inntrivið var lógligt, er niðurstøðan hjá Kærustovninum.

Málið kom fram í sambandi við annað mál

Kærustovnurin fekk kæruna, eftir at hann var vorðin varugur við málið í sambandi við annað mál, sum  
Kærsutovnurin hevði.

Kærustovnurin gjørdi vart við ymisk viðurskifti í sambandi við málið.

Millum annað um kæruvegleiðing og advokat. 

Úrslitið bleiv, at Kærustovnurin fekk kæruna.

Eiga ikki at fremja størri vald enn neyðugt

Kærustovnurin vísti eisini á, at tað áliggur myndugleikanum at hava skerpað vit, tá ræður um avgerðir um inntriv í sjálvsavgerðarrættin hjá fólki.

Grundleggjandi mannarættindi eiga at vera vird. 

Myndugleikin eigur ikki at fremja størri vald enn neyðugt.

Eisini áliggur myndugleikanum at skjalfesta tíðarskeiðið, slíkt inntriv varar, út í æsir.

Kærustovnurin átalar, at myndugleikin ikki helt skyldurnar, sum liggja á honum.