Bretski forsætisráðharrin setur innanríkispolitikkin í miðdepilin

Nýggi forsætisráðharrin í Bretlandi, Andy Burnham, fer at leggja dent á at bøta um viðurskiftini hjá bretum.

Tað sigur Sólvit Nolsøe, stjórnmálafrøðingur, sum vísir á, at hetta fevnir millum annað um at byggja fleiri hús, sum bretskar kommunur lata byggja, umframt ognartøku av fyritøkum, sum veita almennar tænastur.

Í røðu síni í dag nevndi Andy Burnham millum annað, at hann hevur sett sær fyri at bøta um fíggjarligu viðurskiftini hjá bretum og at gera enda á heimloysi.

Ferðin skal setast upp

At lætta um gerandisdagin hjá bretum var eisini nakað, sum fyrrverandi bretski forsætisráðharrin, Keir Starmer, lovaði.

Fyrrverandi forsætisráðharrin setti sostatt hol á arbeiðið, sum eftirmaðurin, Andy Burnham, nú tekur á seg.

Tað hevur tó gingið ov seint fyri seg, og tí er avbjóðingin hjá Andy Burnham, at ferðin má setast upp, sigur Sólvit Nolsøe, stjórnmálafrøðingur.

Sólvit Nolsø

Sólvit Nolsøe, stjórnmálafrøðingur, hevur búð og lisið í Onglandi.

Hoyr longri samrøðu við Sólvit Nolsøe um bretska forsætisráðharraskiftið her:

Andy Burnham tók formliga við sum bretskur forsætisráðharri í dag, tá ið hann hitti Charles kong í Buckingham Palace, har hann játtaði at skipa nýggja stjórn eftir, at fyrrverandi bretski forsætisráðharrin, Keir Starmer, formliga hevði lagt frá sær.

Seinastu árini hevur Bretland havt fleiri stjórnarleiðarar. Andy Burnham er sjeyndi forsætisráðharrin í Bretlandi seinastu tíggju árini.