Føroyar eru styrkismettar saman við stórtjóðum

Føroyar settu í gjár punktum fyri EM-undankappingina við einum 35-27 sigri á Ukraina í høllini við Tjarnir. Hetta var somuleiðis seinasta landsliðsumfar á hesum sinni. Navn er nú sett á tey 24 londini, sum skulu luttaka í EM-endaspælinum, ið verður í Danmark, Svøríki og Norra frá 15. januar til 1. februar komandi ár.

Evropiska Hondbóltssambandið, EHF, hevur í dag kunngjørt, at Føroyar verða styrkismettar í næstovasta styrkisbólki saman við stórum hondbóltstjóðum sum Spania, Kroatia, Norra og grannunum úr Íslandi, umframt Portugal.

Góðu avrikini hjá føroyska manslandsliðnum gera, at Føroyar verða styrkismettar í styrkisbólki 2. Tað var ágóðin av at vinna á Ukraina og vinna undankappingarbólkin. Hetta merkir, at vit ikki kunnu kom í bólk saman við hinum londunum í styrkisbólki 2. 

Tað er longu greitt, at Føroyar verða í bólki D, sum verður spældur í Olso. Umframt hini londini í styrkisbólki 2, kunnu Føroyar heldur ikki koma í bólk saman við Danmark, Týsklandi og Svøríki úr styrkisbólki 1.

Vertstjóðirnar, Danmark, Svøríki og Norra, og verandi EM-vinnararnir, Fraklandi, komu beint til EM-endaspælið. Hinir 20 londini hava spælt seg til endaspælið.

Lutakastið verður hósdagin 15. mai klokkan 18.00.

Styrkisbólkar:

Styrkisbólkur 1: Frakland, Danmark, Svøríki, Týskland, Ungarn, Slovenia

Styrkisbólkur 2: Portugal, Norra, Ísland, Kroatia, Spania, Føroyar

Styrkisbólkur 3: Eysturríki, Holland, Montenegro, Kekkia, Pólland, Norðurmakedónia

Styrkisbólkur 4: Georgia, Serbia, Sveis, Rumenia, Ukraina, Italia