Eysturríki vann Eurovision 2025

Tað var ein sera spennandi og óviss finala. Sum frásøgumaðurin Gunnar Nolsøe segði beint áðrenn seinastu stigini vóru kunngjørd: “Tað er háspenningur í luftini.”

Tað stóð millum Ísrael og Eysturríki, men tá øll stigini vóru tald saman, var tað opera-techno-balladan ‘Wasted Love’, ið tryggjaði Eysturríki fyrsta plássi.

Johannes Pietsch vinnur Eurovision 2025

Caption: 

Ritzau Scanpix //Ida Marie Odgaard

Eurovision fer aftur til Alpurnar

Tá ið Johannes Pietsch, eisini nevndur JJ, vann finaluna, varð greitt, at Eysturríki hýsir kappingini í 2026.

Tað er 69. ferð, at Eurovision-sangkappingini verður hildin, og hetta er triðu ferð, at Eysturríki vinnur kappingina.

Alt kann henda í Eurovision
Hóast Eysturríki vann, var úrslitið als ikki avgjørt áðrenn finaluna. Veddingarfyritøkurnar høvdu m.a. Svøríki, Ísrael og Frankaríki millum teir størstu favorittarnar at vinna.

Finalan hevði fleiri óvæntað úrslit. Eitt nú fekk Sveis, ið var ein av stóru favorittunum hjá dómurunum, null stig frá hyggjarunum – nakað sum skelkaði mong.

Soleiðis sá út, tá ið allar atkvøðurnar vóru taldar:

úrslit frá Eurovision 2025

Caption: 

EUB

Sissal endaði á 23. plássi
Føroyska songkvinnan Sissal, ið umboðaði Danmark, fekk samanlagt 47 stig – 45 stig frá dómarunum og 2 stig frá hyggjarunum – og endaði sostatt á 23. plássi, júst aftanfyri Luxembourg, sum fekk somu stigatal.

Dómarastigini til Danmark vóru hesi:

10 stig: Stóra Bretland

8 stig: Eysturríki

7 stig: Italia

5 stig: Avstralia

1 stig: Kekkia

Hetta gav Danmark eitt 17. pláss frá dómarunum.

Hóast Sissal ikki rakk málinum um at koma í topp 13, so vann hon nógv hjørtu við sínum framførslum, og so hevur hon eisini brotið eina langa danska "finaluforbannilsi".

Vinarlag yvir landamørk
Sissal hevur eisini, sambært donskum miðlum, fingið ein góðan vinmann í JJ úr Eysturríki, og teirra vinarlag hevur vaksið í vikunum upp til finaluna. Tað sást aftur í samveruni eftir úrslitið – eitt dømi um, hvussu Eurovision eisini førir fólk saman tvørtur um landamørk.