Føroyar og Danmark gera semju um talgilt koyrikort

Bæði í Føroyum og í Danmark kanst tú hava talgilt koyrikort eitt nú á telefonini, so tær ikki nýtist at minnast pengapungin, tá tú fert út at koyra. 

Men føroyska og danska skipanin hava ikki tosað saman, men danski samferðslumálaráðharrin, Thomas Danielsen, og Jóhan Christiansen, landsstýrismaður í samferðslumálum, eru nú samdir um at taka avmarkingina burtur, soleiðis at eitt talgilt koyrikort í Føroyum skal eisini vera galdandi í Danmark – og øvugt.

- Vónandi er hetta fyrsta stigið til, at talgilta føroyska koyrikortið eisini verður viðurkent í fleiri ES-londum, sigur Jóhan Christiansen, landsstýrismaður í samferðslumálum, í tíðindaskrivi.

Thomas Danielsen og Jóhan Christiansen

Tá Thomas Danielsen, flutningsmálaráðharri, og Jóhan Christiansen, landsstýrismaður, høvdu skrivað undir avtaluna um koyrikortið. 

Tað er í samband við, at Thomas Danielsen, danskur ferðslumálaráðharri, skal koma á stutta føroyavitjan í dag, at avtalan um talgildu koyrikortini landana millum er komið í lag, og harvið er ein loysn gjørd, soleiðis at føroysku koyrikortini verða partur av talgildu skipanini í Danmark.

Anna Falkenberg, fólkatingskvinna fyri Sambandsflokkin, tók í fjør málið upp við ráðharran, tí hon hevur fingið fleiri áheitanir um, at føroyingar eru ónøgdir við, at hevur tú eitt talgilt føroyskt koyrikoyrt, so bar ikki til at fáa tað góðkent í donsku talgildu skipanini.