86 prosent avlop gerast fjarhiti

Í fjør komu góð 86 prosent av fjarhitanum frá avlopshita frá Kommunalu brennistøðini á Hjalla, Sundsverkinum og biogassverkinum Förka, sigur Fjarhitafelagið í tíðindaskrivi eftir aðalfund felagsins í gjár.

Gassoljan er støðugt minkandi í fjarhitaskipanini. 

Oljan er nú fyrst og fremst eykatrygd at taka til, um ikki nóg mikið av avlopshita fæst, ella um okkurt brek er.

Fjarhitafelagið hevur nú 14 kilometra langa høvuðsleiðing.

Landssjúkrahúsið næst

Annita á Fríðriksmørk, forkvinna í Fjarhitafelagnum, sigur, at nú er ætlanin at knýta Landssjúkrahúsið upp í fjarhitanetið.

Fróðskaparsetrið á Frælsinum var fyri stuttum bundið í netið. 

Ein elketil við goymslutanga, sum skal rekast við avlopsorku frá vindmyllum, kemur í næstum.

Og um Landssjúkrahúsið kemur upp í fjarhitanetið, ber eisini til at byggja eina sjóhitapumpu inn í fjarhitaskipanina.

Hon skal rekast við avlopsorku frá vindmyllum.
 
Tórshavnar kommuna og SEV eiga p/f Fjarhitafelagið helvt um helvt.