Fótbóltskvinnurnar: Væl fyri eftir drúgva ferð

Føroyska fótbóltslandsliðið við kvinnum væntar sær ein javnan dyst, tá tær vitja Moldova í Chisinau í næstseinasta umfari av Nations League í kvøld.

 - Vit hava fyrireikað okkum upp á eitt sindur av hvørjum, men vit vænta ein javnan dyst. Tað sigur landsliðsvenjarin, Pætur Smith Clementsen, millum annað í samrøðu við FSF Varpið.

Føroyski hópurin kom til moldoviska høvuðsstaðin Chisinau seinnapartin týsdagin, og síðani hava tríggjar venjingar verið á skránni.

Allar væl fyri, hóast ferðin var drúgv, og ætlanin er at endurtaka sigurin frá apríl, tá Føroyar vunnu 2-0 á moldavum á Tórsvølli. Ta ferðina skutu Durita Hummeland og Heidi Sevdal føroysku málini.

Næstfremstar í bólkinum

Tað hevur gingið væl hjá føroysku kvinnunum í Nations League í ár. Eftir greitt tap í fyrsta dystinum fyri Slovakia á útivølli hava Føroyar vunnið tríggjar dystir á rað.

Føroyar eru tí næstfremstar við níggju stigum aftanfyri Slovakia, sum hevur 12 stig. Moldova hevur trý stig, og Gibraltar, sum er við fyri fyrstu ferð, hevur einki stig fingið enn.

Dysturin millum Moldova og Føroyar verður stroymdur á kvf.fo. Veljið “sjón” og síðani KVF 2.