Reidar Nónfjall sendur til hús

Reidar Nónfjall, floksskrivari í Sambandsflokkinum, og Bárður á Steig Nielsen, formaður í Sambandsflokkinum hava gjørt fráfaringaravtalu, sum hevur við sær, at floksskrivarin tey seinastu mongu árini, Reidar Nónfjall, fer úr starvi sínum í endanum av september.

Reidar Nónfjall váttar, at fráfaringaravtala er gjørd millum partarnar, men hann metir ikki, at fráfaringaravtalan er gjørd sambært viðtøku floksins, sum tilskilar, at tað er Landsnevndin í flokkinum, sum hevur við starvsfólkaviðurskifti at gera.

Reidar Nónfjall hevur ikki fleiri viðmerkingar til málið.

Váttar fráfaringaravtaluna

Bárður á Steig Nielsen, formaður í Sambandsflokkinum, váttar, at fráfaringaravtala varð gjørd við Reidar Nónfjall síðst í mars mánaði.

Hann vil ikki gera bandaða samrøðu um málið. 

Hann vil ikki gera fleiri viðmerkingar, men sigur tó, at Sambandsflokkurin nú ger seg til reiðar til komandi løgtingsval.