Trump vil hitta Putin og Zelenskyj

Amerikanski forsetin, Donald Trump, ætlar at fáa ein fund í lag við russiska forsetan, Vladimir Putin, og ukrainska starvsbróðir hansara, Volodyymyr Zelenskyij. Og gongur tað, sum Donald Trump ætlar, so verður fundurin longu í næstu viku.

Tað skrivar NRK á heimasíðu síni.

Tað var Karoline Leavitt, talskvinna hjá forsetanum, sum boðaði frá russiska ynskinum um ein fund við amerikanska forsetan, og í sama viðfangi segði hon, at Donald Trump fegin vil hitta báðar stríðandi forsetarnar.

Á einum tíðindafundi váttaði Donald Trump, at tað ikki er óhugsandi, at fundur fæst í lag millum partarnar.

- Vit hava havt góðar samrøður við Putin, og tær ganga rættan veg, segði hann.

Steve Witkoff og Vladimir Putin 6. aug. 2025

Í gjár hitti serligi amerikanski sendimaðurin, Steve Witkoff, Vladimir Putin, forseta í Kreml. (Mynd: Gavriil Grigorov/Reuters/Ritzau Scanpix)

Russland komið við krøvum

Marco Rubio, amerikanskur uttanríkisráðharri, sigur, at fyri fyrstu ferð í langa tíð er Russland komið við dømum um, hvat landið krevur fyri at enda kríggið. Hann leggur aftrat, at týdningarmestu viðurskiftini snúgva seg um landaøki.

Tað skrivar Reuters.

Hinumegin borðið sigur ukrainski forsetin, Volodymyr Zelenskyi, at tað sær út til, at trýstið á Russland virkar, tí landið eftir øllum at døma nú er meira opið fyri einari vápnahvíld.