Ákærdir fyri svik og misnýtslu

Í Grønlandi er landsrætturin farin undir at viðgera málið, har fyrrverandi landsstýrisformaðurin, Lars-Emil Johansen, og fyrrverandi kommunustjórin í Nuuk, Lars Møller Sørensen, eru ákærdir fyri svik og embætismisnýtslu. 

Tá málið var fyri í býarrættinum í januar, blivu báðir funnir sekir í ákærunum, og dómurin var seks treytaleys fongsulsrevsing í seks mánaðir. 

Báðir kærdu dómin til landsrættin.

Málið snýr seg í stuttum um, at Lars Emil Johansen í 2019 varð settur í starv sum serligur ráðgevi í Sermersooq kommunu, sum Nuuk er partur av. 

Landsrætturin í Grønlandi

Landsrætturin í Grønlandi. (Mynd: Wikipedia)

Ongar uppgávur

Sambært ákæruvaldinum var trupulleikin bara, at talan var ikki um nakað veruligt arbeiði. Ongar uppgávur vóru til Lars Emil Johansen, sum tó hevði fingið 730.000 krónur útgoldnar í løn frá kommununi, tá málið kom undan kavi í 2021.

Sambært dóminum visti í veruleikanum eingin, at fyrrverandi landsstýrisformaðurin var settur sum serligur ráðgevi í kommununi, og ei heldur, hvat hann skuldi gera fyri kommununa.

Lars-Emil Johansen varð dømdur fyri svik, og kommunustjórin dømdur fyri at hava misnýtt sítt embæti.

Ákærin góðtekur treytaða fongsulsrevsing

Grønlendski miðilin Sermitsiaq fylgir málinum í landsrættinum. Miðilin skrivar, at ákærin krevur eitt árs fongsulsrevsing til báðar. Men ákærin vil harafturímóti góðtaka, at dómarnir gerast treytaðir.

Lars-Emil Johansen og Lars Møller Sørensen nokta seg framvegis sekar.

11 vitni skulu avhoyrast í landsrættinum, teirra millum fyrrverandi borgarstjórar í Nuuk, fyrrverandi landsstýrismaðurin, Vittus Qujaukitsoq og aðalstjórin í fíggjarmálaráðnum, Nikolai Christensen.