Kakkulakkur umborð á Galaxy: Óheppið sigur SSL

- Sjálvandi er hetta eitt sindur óheppið, men vit gera alt vit kunnu og fara eisini at taka tað upp í morgin, sigur Niels Juel Arge, stjóri í Strandfaraskipum landsins, eftir at ein kakkulakkur var sæddur á vesinum umborð á Galaxy á veg suður fyrr í dag. Dagin fyri, at Galaxy fór úr Grikkalandi, fyri 12-13 døgum síðani, varð skipið reinsað fyri kakkulakkar, men tað kann taka eini 20 dagar, áðrenn allir eru burtur, greiðir Niels Juel Arge frá. Men í morgin fara tey á Strandfaraskipum Landsins at seta seg í samband við onkran, sum kann hjálpa at sleppa av við kakkulakkar, lovar hann. 

Galaxy byrjaði siglingina á Suðuroyarleiðini, á hesum sinni, í gjár og skal avloysa Smyril í 8-10 vikur. Longu áðrenn Galaxy byrjaði siglingina í gjár, høvdu nógv gjørt vart við sína ónøgd, millum annað tí, at skipið er minni, siglir seinni og ikki líka ofta sum Smyril. Eisini hevur stríð verið millum Strandferðsluna og Maskinmeistarafelagið, tí maskinmeistarar, sum skulu sigla við Galaxy, kenna seg ótrýggir um hvørt føroyskir sáttmálar og reglur eru galdandi.