Fingu Ishkov at kvøða Bukkutátt

Tað var í sjeytiárunum, at Føroyar og táverandi Sovjetsamveldið fóru at gera veruligar fiskivinnusáttmálar sínamillum. Alexander Ishkov, sum í eitt mannaminni var ráðharri í fiskivinnumálum í Sovjetsamveldinum, vitjaði javnan í Føroyum hesi árini. 

Ishkov var ráðharri undir Stalin. Tað segðist, at hann fall í ónáðir, men slapp undan at bøta við lívinum. Tá ið eirindaleysi einaræðisharrin doyði, fekk Ishkov uppreisn. Føroyingar hildu Ishkov vera fryntligan, og sum skilst vóru hann og føroyski landstýrismaðurin í fiskivinnumálum, Petur Reinert, á bylgjulongd. Tað sigst, at einaferð teir vóru farnir upp á gólv at kvøða Bukkutátt, fingu teir Ishkov upp í ringin.

Føroyska sendinevndin í Leningrad í 1980

Føroyska sendinevndin í Leningrad í 1980. Heðin M. Klein, landstýrismaður í fiskivinnumálum, í miðjuni millum Hjalta í Jákupsstovu, fiskivinnufrøðing og Árna Olafsson, skrivstovustjóra í Landsstýrinum. Vinstrumegin sovjetiski fiskimálaráðharrin Vladimir Kamentsev.
 

Tann elsti núlivandi fyrrverandi landsstýrismaðurin í fiskivinnumálum er helst Heðin M. Klein. Hann kom í landsstýrið, sum var skipað í 1979. Tá vóru fiskivinnusáttmálarnir við Sovjetsamveldið júst komnir í fasta legu.

Heðin Klein var sjálvur í Sovjetsamveldinum og tingaðist við myndugleikarnar har um fiskivinnusamstarv. Tað var í Leningrad í august 1980. Vladimir Kamentsev hevði tá loyst av Alexander Ishkov sum ráðharri í fiskivinnumálum í Sovjetsamveldinum.

Heðin M. Klein sigur, at vinnuliga samvinnan millum Føroyar og Sovjetsamveldið byrjaði nógv fyrr enn so.

Lurta eftir samrøðuni við Heðin M. Klein í Summarmorgni