Álop á Kyiv kravt fleiri mannalív

Eitt russiskt álop á ukrainska høvuðsstaðin, Kyiv, hevur í nátt kravt í minsta lagi tíggju mannalív.

Millum tey deyðu eru tvey børn.

Tað siga ukrainskir myndugleikar.

Alla nátt vóru 598 dronur og 31 rakettir sendar ímóti Ukraina, sambært ukrainsku loftverjuni. Nú royna bjargingarfólk at bjarga fólki úr húsaleivdunum.

Borgarstjórin í Kyiv, Vitalij Klytjko, upplýsir sambært Reuters tíðindastovuni, at 38 fólk hava fingið løstir.

- Russland velur at brúka vápn í staðin fyri at fara til samráðingarborðið, skrivar ukrainski forsetin.

Russland hevur ikki viðmerkt álopið, men sigur, at russiska verjan í nátt hevur skotið niður 102 ukrainskar dronur í sjey landspørtum. Ukraina sigur, at álop eru framd á tvey russisk oljureinsiverk.