Tónleikasambandið: Nú ber aftur til at søkja um Økistóna-stuðul

Økistónar er stuðulsskipani, sum veitir stuðul til spælistøð og fyriskiparar, ið ynskja at skipa fyri konsertum við høgari góðsku, men sum ikki altíð hava fíggjarligt rásarúm til tess.

Endamálið við stuðlinum er at tryggja, at tónleikarar fáa minstuløn, og at fyriskiparar fáa betri møguleika at bjóða tónleiki fram – eisini har, ið annars hevði verið torført.

Tónleikasamband Føroya boðar frá, at nú ber til at søkja um stuðul til tónleikatiltøk í tíðarskeiðinum 1. januar til 1. mai 2026. 

Freistin at søkja er 1. oktober 2025.

Minstaløn og reglusemi

Skipanin við Økistónum leggur dent á reglusemi, økisumboðan, góðsku, javna kynsumboðan, tónleikaligt fjølbroytni og nýskapan.

Hon skal gera tað lættari at arbeiða sum konsertfyriskipari, og at menna eina sterka konsertmentan kring alt landið.

Fyriskiparar kunnu søkja um 2.000 krónur fyri hvønn tónleikara, tó í mesta lagi 10.000 krónur fyri hvørt tiltak.

Raðfestingar hjá úrvalsnevndini

Úrvalsnevndin leggur dent á eitt ella fleiri av hesum viðurskiftum:

• Økismennandi virksemi; bæði tá talan er um alt landið, og eisini innanhýsis í kommununum.
• Reglusemi í virkseminum.
• Virksemi, sum ikki framanundan er stuðlað.
• Undanfarið virksemi hjá fyriskipara, grundað á viðhefta frágreiðing í umsóknini.
• Nýskapandi og/ella eginframleiddan tónleikan.
• Tónleikaligt fjølbroytni.
• At umsóknin er væl frágingin.

Tað er ikki eitt krav at røkka øllum hesum endamálum.

Treytirnar

Treytirnar fyri at fáa stuðul úr Økistónum er, at: 1) Mann er limur í Konsertfyriskiparafelagnum, sum er ókeypis. 2) At mann hevur KODA-sáttmála ella betalur KODA-pengar fyri hvørja konsert.

Limaskapur í Konsertfyriskiparafelagnum er ókeypis, og tú kanst blíva limur við at senda teldupost til: konsertfo@gmail.com.

Um onkur fyriskipari hevur spurningar viðvíkjandi Koda, so kunnu hesir spurningar eisini sendast til Konsertfyriskipararfelagið.