USA lækkar tollin á bilum og øðrum vørum úr Japan

Afturfyri fer Japan at gera millardaíløgur í amerikanskar verkætlanir og at gera sáttmála um 100 Boeing-flogfør

Høgi amerikanski tollurin hevur m.a. rakt Toyota-bilverksmiðjurnar í Japan meint, men nú er avtala fingin í lag, sum ber í sær, at tollurin lækkar. (Savnsmynd)

Johnsigurd Johannesen

05.09.2025 - 10:21

Amerikanski forsetin, Donald Trump, hevur givið boð um lækka tollin á japanskum bilum og øðrum japanskum vørum.

Avtalan er fingin í lag eftir samráðingar í fleiri mánaðir, og hon fær stóran týdning fyri japanska bilídnaðin. Samstundis váttar avtalan, at Japan fer at gera íløgur í amerikanskar verkætlanir fyri 550 millardir dollarar.

Tollurin, sum Trump ásetti fyrr í ár, hevur rakt japanska bilídnaðin meint. Toyota boðaði í august frá, at fyritøkan væntaði at missa umleið 10 milliardir dollarar, í kjalarvørrinum av amerikansku tollhækkingini.

Nýggja avtalan ber eisini í sær, at Japan skal keypa 75 prosent meira rís úr USA og aðrar amerikanskar landbúnaðarvørur, m.a. mais, soya og tøð, fyri umleið átta milliardir um árið.

Japan fer eisini gera sáttmála 100 amerikansk Boeing-flogfør, og at økja innflutningin av amerikanskari hernaðarútgerð, úr 14 milliardum upp í 17 milliardir dollarar.