Grønland: Politikarar ikki kunnaðir um útlendskar vitjanir

Limirnir í uttanríkis- og trygdarpolitisku nevndini í Grønlandi verða ikki kunnaðir, tá ið útlendskir topp-politikarar koma á vitjan í Grønlandi. 

Tað sigur Pele Broberg, formaður politiska flokkinum Naleraq.

Í síðstu viku var týski varaverjumálráðharrin, Nils Schmid, á vitjan, og sunnudagin var franski uttanríkisráðharrin, Jean-Noël Barrot, á stuttari vitjan í Nuuk. 

Men limirnir í uttanríkis- og trygdarpolitisku fingu lítið og einki at vita um vitjanirnar.

Og tað er ikki í lagi, sigur Pele Broberg.

- Vit fingu ikki at vita um vitjanirnar. Allar upplýsingarnar, vit hava, hava vit frá fjølmiðlaumrøðuni. Landsstýrið upplýsir okkum ikki um, hvat tey gera, ella ikki gera, so okkara vitan kemur bara frá fjølmiðlunum, sigur Pele Broberg úr Naleraq, sum er næstformaður í uttanríkis- og trygdarpolitisku nevndini.

Pipaluk Lynge

Pipaluk Lynge. (Mynd: KNR)

Ikki skyldu at upplýsa

Forkvinnan í Uttanríkis- og trygdarpolitisku nevndini, Pipaluk Lynge úr Inuit Ataqatigiit, er samd við Pele Broberg. 

- Men sambært okkara sjálvstýrislóg hevur landsstýriskvinnan í uttanríkismálum í roynd og veru hvørki skyldu at upplýsa ella ráðføra seg við okkum í uttanríkis- og trygdarpolitisku nevndini. Hinvegin halda vit í Inuit Ataqatigiit, at tað er týdningarmikið at samstarva við okkara altjóða samstarvsfelagar, tí hetta kemur borgarunum til góðar. Tí eiga vit sum tinglimir eisini at verða hoyrd, sigur Pipaluk Lynge í KNR-sendingini "Ulluni makkunani pisunit".

Tað hevur ikki eydnast grønlendska kringvarpinum KNR at fáa viðmerking frá Vivian Motzfeldt, landsstýriskvinnu í uttanríkismálum.