Fimm Hamas-limir doyðu í ísraelska álopinum á Katar

Sambært Hamas eru fimm limir, teirra millum sonur Hamas-leiðaran, Khalil al-Hayya, dripnir í ísraelska álopinum í gjár á eini íbúðarhús í Doha, høvuðsstaðnum í Katar.

Tað skrivar tíðindastovan Reuters.

Hamas sigur, at bæði Ísrael og USA hava ábyrgdina av álopinum. 

Karoline Leavitt, talskvinna fyri Hvítu húsini, váttaði á tíðindafundi í gjárkvøldið, at USA varð kunnað um álopið frammanundan:

- Trump, forseti, bað beinanvegin serliga sendimann sín, Witkoff, um at boða Katar frá álopinum, sum var á veg. Tað gjørdi hann. Forsetin sær Katar sum trúgvan sameinda og vin hjá USA, og er sera harmur um staðsetingina av hesum álopinum. 

Katar vísir aftur

Men Katar vísir aftur, at tey vóru ávarað um álopini.  

Tað sigur Majed Al-Ansari, talsmaður hjá uttanríkismálaráðnum í Katar, í almennari fráboðan, sum varð løgd fram samstundis sum tíðindafundur var í Hvítu Húsunum.

Forsætisráðharrin, Sheikh Mohammed bin Abdulrahman al-Thani, fordømir álopið og sigur, at Katar tekur sær rættin at svara álopinum aftur. 

Donald Trump hevur, sambært NTB, sagt, at hann varð ikki kunnaður um álopið frammanundan.

Katar boðaði í gjár frá, at landið ikki longur verður partur av samráðingunum millum Ísrael og Hamas um frið í Gasa. 

Katar hevur higartil verið vertur fyri hesum samráðingum, ið skulu slóða fyri vápnahvíld.