Vikugesturin: Tann fitti floksformaðurin

Hann kom longu 19 ára gamal upp í politikk, tá ið hann sum landingarmaður á Kósini var valdur í Klaksvíkar býráð. Longu trý ár seinni kom hann buldrandi inn á løgtingið við 998 atkvøðum sum fyrstvaldur á fólkaflokslistanum. Og í 2022 fekk hann 1688 atkvøður, nú hann sum bara 25 ára gamal hevði yvirtikið formanssessin í Fólkaflokkinum, sum hevði stórar trupulleikar innanfloks.

- Tað var ein øgiliga keðilig støða og keðilig tíð beint tá fyri flokkin. Og eg var eisini rættiliga keddur um, at hesar ósemjurnar blivu lagdar á blik, heldur enn at tær vóru hildnar innanhýsis. So endaði tað við, hetta kvøldið, at eg bleiv formaður. Val var útskrivað dagin fyri, og so kann man spyrja, nær rætta løtan er at gerast formaður. Tað var nokk ikki tann upplagda tíðin, um man skal tosa um, hvør er tann rætta løtan.

Við Beini við róðrið er Fólkaflokkurin reistur aftur, og tað er við einum formanni, sum er grundleggjandi øðrvísi enn sínir undanmenn.

Beinir Johannesen viðgongur í hesi samrøðuni, at hann er innvendur og heldur smæðin av lyndi, og hann er ikki tann, sum heldur seg fram at mikrofonini, men tað hevur hann arbeitt við, tí tað krevur politiski leikluturin.

Eitt, sum nógv siga um Beinir Johannesen sum persón er, at hann er ein ógvuliga fittur og fyrikomandi persónur. 

- Beinir er ein ótrúliga savnandi persónur. Øllum dámar Beinir, sigur Elsebeth Mercedes Gunnleygsdóttir, sum er einasta tingkvinnan hjá Fólkaflokkinum. 

- Hann er loyvalur, lokalur og fittur. Ein stuttligur og positivur persónur, sigur Jákup B. Andreasen, liðformaðurin í KÍ, sum er barndómsvinur við Beinir Johannesen.

Sjálvur heldur Beinir Johannesen, at hetta eru eginleikar og virði, sum hann hevur fingið lagt í seg frá barnsbeini. 

Hoyr samrøðuna við Beinir Johannesen, har vit eisini koma inn á hansara bakgrund, uppvøkstur og hvat hann leggur dent á sum ungur formaður í einum politiskum flokki.