Grindin var ov stór at halda til

- Hevði eg vitað, at grindin var so stór, so hevði eg neyvan givið loyvi til at halda hana til. Í øllum førum ikki allari grindini.

Tað sigur Jacob Vestergaard, sýslumaður í norðurøkinum, um stóru grindina, sum legði beinini í Fuglafirði í gjárkvøldið. Tá avtornaði lógu 285 hvalir deyðir á sandinum, men ikki allir hvalirnir, sum komu inn á fjørðin, vóru hildnir til.

- Tá formenninir varnaðust, hvussu nógv var komið upp á land, bóðu teir bátarnar fara út frá og so slapp restin av grindini at halda aftur til havs.

Tað kemur ikki so ofta fyri, at grindin verður slept og slett ikki, tá drápið er byrjað. Fyri kortum varð ein grind rikin út aftur av Miðvági, tí har var ov lítið til av fólki at halda henni til, men tað, sum hendi í Fuglafirði í gjár er meira sjáldsamt. Tað viðgongur sýslumaðurin eisini.

Jacob Vestergaard hevur altíð verið fortalari fyri, at vit skulu halda fram at drepa grind, men hann vil ikki hava, at vit drepa grind, um tað er nóg mikið til. Og tað er tað sambært honum í norðurøkinum. Kringvarpið hevur fingið at vita frá onkrum í norðurøkinum, at tey ikki hava so nógv, sum Jacob Vestergaard leggur upp til, men sambært sýslumanninum er tað ikki rætt at halda einari stórari grind til, um vandi er fyri, at alt ikki verður tikið upp.

Sýslumaðurin í norðurøkinum leggur afturat, at tað er nógv sum týðir uppá, at tað er nógv grind til í løtuni.

- Í nátatíðini fingu vit fleiri ferðir boð um grind, men vit lótu grindirnar fara. Og sum støðan er nú er tað ikki ráðiligt at halda fleiri grindum til, tí so er vandi fyri, at vit ikki taka alt upp, og tað skal ikki henda, sigur Jacob Vestergaard.

Trýst á leinkið niðanfyri og hoyr alt innslagið, sum var í tíðindunum klokkan 14.00: