Bjørg er Føroya fyrsti hundamýkjari

Pína og spenningar í nakka og mjadnum.

Hetta er nakað, sum fleiri fólk munnu kenna til, men eisini hundar kunnu dragast við júst somu trupulleikar.

Tí hevur Bjørg Brekku Clementsen nomið sær útbúgving sum hundamýkjari.

- Mítt áhugamál er hundar. Eg havi arbeitt við hundum í nógv ár, so fyri meg var tað natúrligt at fara undir hesa útbúgvingina, sigur Bjørg Brekku Clementsen, sum hevur innrættað grovkøkin í heiminum í Hoyvík til endamálið.

Sambært henni er ein tørvur á hundamýking í Føroyum.

- Tað er stórur tørvur á tí í Føroyum. Her eru nógvar venjingar, og júst eins og hjá menniskjum hava hundar eisini tørv á at fáa mýking, sigur Bjørg Brekku Clementsen.

Flest allir hundar kunnu fáa vøddamýking, tó eru nøkur sløg meira avbjóðandi at mýkja enn onnur.

- Tað vísir seg, at eitt nú seyðahundar og myndur eru rættiliga sensitiv og skulu so at siga venja seg við fingrar á kroppinum, sigur Bjørg Brekku Clementsen.

Ein vanlig vøddamýking tekur millum 30 og 45 minuttir, og umráðandi er, at hundurin slappar av tann dagin og ikki ger nakra harða venjing.

Umframt at vera hundamýkjari er Bjørg Brekku Clementsen eisini í ferð við at útbúgva seg til fysioterapeut fyri hundum.