Rakstrarleiðarin á SSL: Hekkuportrið var ikki opið

- Portrið á Galaxy var ikki opið, túrin um Suðuroyarfjørð 1.september. Tað er tað, sum eg havi fingið upplýst frá okkara fólki umborð. 

Tað sigur Niels Nielsen, rakstrarleiðari á Strandferðsluni, sum hevur biðið um eina nærri frágreiðing, eftir at ein mynd í gjár varð almannakunngjørd, sum vísir, at hekkuportrið á Galaxy var opið, meðan skipið sigldi. 

Hann væntar at fáa frágreiðingina seinni í dag. 

Sambært Nielsi Nielsen er tað ikki fyrr enn í gjár, at hann fyrstu ferð sær myndina, ið er tikin av dekkinum á Galaxy, klokkan 19:36 mikukvøldið 1. september.

Galaxy sigldi tá beint eystan fyri Lítlu Dímun, á veg suður á Krambatanga. 

16092025_dov_innslag_galaxy_0003.jpg

Myndin vísir, at hekkuportrið er ikki aftur, og dagsljós sæst ímillum. 

Myndin, ið varð víst á heimasíðuni hjá Kringvarpinum og í Degi & Viku í gjárkvøldið, vísir, at hekkuportrið er ikki aftur - dagsljós sæst ímillum - og eisini er ein stroppur bundin í portrið. 

Hoyr samrøðu við Niels Nielsen í útvarpstíðindunum:

Gera ikki meira við málið

Hans Johannes á Brúgv, stjóri í Sjóvinnustýrinum, er burturstaddur, men Jákup K. Poulsen, maritimur ráðgevi í Sjóvinnustýrinum, sigur, at fyribils ger Sjóvinnustýrið ikki meira við málið. 

- At vit í gjár fingu staðfest, at tað riggar at lata hekkuportrið aftur, at tað riggar at skalka, og at tað verður gjørt, er tað, sum hevði størst týdning fyri okkum, sigur Jákup K. Poulsen.

Hann vil ikki gera bandaða samrøðu við Kringvarpið, men hann sigur, at nú verður bíðað eftir frágreiðingini frá Strandferðsluni.