Álopið við Sandá: Ákærurit er skrivað

Maðurin, sum er skuldsettur fyri álopið við Sandá í fjør, skal vera fýra vikur aftrat í varðhaldinum.

Tað er sjálvboðið.

Maðurin er skuldsettur fyri at leypa á eina kvinnu á gøtuni við Sandá, eystan fyri fótbóltsvøllin á Argjum, sunnukvøldið 28. apríl í fjør.

Hann noktar seg sekan.

Ákæruvaldið hevur bíðað eftir meting frá rættarlæknaráðnum.

Hon er nú komin, og ákærurit er skrivað.

Nevningating

Nevningating verður í Føroya rætti, sum hevur sett av fimm dagar til viðgerðina.

Maðurin, sum er í tríatiárunum og útlendingur, hevur verið í varðhaldi síðani 28. apríl í fjør.

Tá fólk hava verið í varðhaldi í eitt ár, skulu serligar umstøður til, skal varðhaldið leingjast.

Serligar umstøður eru í hesum málinum, metir rætturin. 

Maðurin hevur einki tilknýti til Føroya.

Hann kom til Føroya 20. apríl og var tikin eina viku seinni, 28. apríl.

Sleppur hann leysur, er vandi fyri, at hann fer av landinum, er pástandurin hjá ákæruvaldinum.

Tá nevningating er, skal kravið um revsing vera minst fýra ára fongsul.