Stríðskvinna í Venesuela fær friðarheiðursløn Nobels

58 ára gamla Maria Corina Machado úr Venesuela hevur fingið friðarheiðursløn Nobels fyri stríð sítt í heimlandinum fyri fólkaræði.

Formaður í Nobel-nevndini, Jørgen Watne Frydnes, segði millum annað, at Venesuela er farið frá at vera eitt rímiliga vælvirkandi fólkaræði og land, til eitt rátt einaræði, har búskapurin liggur í skeljasori, og mannarættindini ikki verða vird.

Maria Corina Machadi er fødd í 1967 í Caracas í Venesuela.

Misti tingsessin

Hon stóð millum annað á odda  fyri flokkinum Vente Venezuela, sum var stovnaður í 2012. Hon sat í tjóðartinginum  frá 2011 til 2014, men misti sín sess, tí hon mótmælti stýrinum hjá Nicolas Maduro, forseta. Hon hevur samdstundis mist rættin til at virka alment í 15 ár.

Amerikanski forsetin, Donald Trump, hevur fleiri ferðir seinastu tíðina gjørt vart við, at hann átti at fingið friðarheiðurslønina fyri sítt arbeiði at fáa frið í lag millum lond, og nú at enda stríðið í Gasa.

Men Nobel-nevndin sigur, at útgangsstøðið fyri tilnevningini skal takast í tí, sum er hent í 2024, og ikki tí, sum hendir nú.