Mótmæla 13 tíma arbeiðsdegi í Grikkalandi

Umleið tíggju túsund fólk mótmæltu í morgun í Athen og Thessaloniki við kravi um, at stjórnin sleppur ætlanum at loyva upp í 13 tímars arbeiðsdøgum. 

Arbeiðsfólk í høvuðsstaðnum Athen eru í arbeiðssteðgi í dag, og tað ávirkar almennu samferðsluna í býnum meint.

Grikska tjóðartingið fer at atkvøða um uppskotið í morgin. 

Stjórnin sigur, at tað fer ikki at hava við sær stórar broytingar, tí hon loyvir bara longri arbeiðstíð. 

Men andstøðan og fakfeløgini vísa á, at um arbeiðsfólk nokta at arbeiða longri tímar, so eru tey í vanda fyri at missa arbeiðið. Summi fakfeløg eru hvassorðað og kallað uppskotið nútímans trælahald.

Siðbundni arbeiðsdagurin í Grikkalandi er átta tímar, og yvirtíð er loyvd um arbeitt verður longur. 

Stjórnin hjá Kyriakos Mitsotakis hevur í eina tíð arbeitt við at broyta arbeiðslógina. 

Hon hevur longu lóggivið seks daga arbeiðsviku og øktan fleksibilitet hjá arbeiðsgevarum at kalla fólk til arbeiðis til dømis um summarið í ferðavinnuni.