Hagstovan: Skattatrýstið í Føroyum næststørst í Norðurlondum

Skattatrýstið í Føroyum veksur.

Tað var 41,9 prosent í fjør, 1,3 prosentstig størri enn í 2023, skrivar Hagstovan. 

Hon skrivar, at orsøkin er, at vøksturin í skattainntøkunum var størri enn búskaparvøksturin.

Inntøkurnar frá skattum og sosialum gjøldum vóru 11,7 milliardir krónur í fjør, 700 milliónir, 6,4 prosent, meira enn í 2023.

Skattatrýstið verður roknað sum skattir og avgjøld tilsamans í prosentum av bruttotjóðarúrtøkuni. 

BTÚ vaks 2,9 prosent

Vøksturin í bruttotjóðarúrtøkuni í ársins prísum var bara 2,9 prosent í fjør, og tí vaks skattatrýstið, skrivar Hagstovan.

Skattatrýstið vaks nógv í 2020, tá korona kom. Skattatrýstið var tá 43,7 prosent. 

Síðani er tað minkað hvørt ár til 2024, tá tað aftur vaks. 

Í 1999 var skattatrýstið í Føroyum 46 prosent. 

Skattatrýstið nú er tað næststørsta í Norðurlondum.

Í Danmark er tað 45,4 prosent, í Íslandi er tað 30,6 prosent.