Landskappingin í talvi byrjar við metluttøku

Tey ellivu talvfeløgini í landinum hava meldað tretivu lið til landskappingina, sum byrjar í dag. So stór luttøka hevur ikki verið fyrr, skrivar Talvsambandið.

Ikki færri enn 425 telvarar eru skrásettir í teimum ellivu feløgunum, sum hava boðað frá luttøku í kappingini í vetur. Telvað verður í fýra deildum. Í fremstu trimum deildunum eru liðini seks í tali. Í 4. deild eru tey 12, býtt sundur í tveir bólkar.

Harumframt telva tey yngstu fyri seg í aðrari kapping.

Trý feløg skara framúr

Trý feløg eru í flokki fyri seg. Havnar Telvingarfelag, Sandavágs Talvfelag og Klaksvíkar Talvfelag manna einsamøll bestu deildina. Feløgini hava tvey lið hvør í kappingini um meistaraheitið.

Felagsliðið í Sundalagnum, Rókur, hevur vaksið seg til hitt næststørsta í landinum. Rókur er tað, sum nú er eftir av virknum talvfeløgum í Norðstreymoy og har á leiðini - tó er Kollafjarðar Talvfelag framvegis fyri seg í besta blóma.

Vit síggja eisini, at fyrrverandi Runavíkar Talvfelag, sum nú kallast Kongshavnar Talvfelag, hevur hópin av telvarum, fleiri enn í teimum siðvandnu talvfeløgunum í Klaksvík, Kollafirði, á Toftum og í Gøtu. Vestmanna, sum í nógv ár var háborgin fyri telving í Føroyum, hevur afturímóti ilt við at halda tørn.

Vágamenn styrkja seg

Hyggur tú eftir styrkilistunum, sum feløgini hava latið Talvsambandinum til liðkappingina, er serliga eitt navn, sum vekir ans. 

Nummar eitt á listanum hjá Sandavágs Talvfelag stendur enski stórmeistarin Gawain Jones. Hann er fastur fúsur á enska OL- og EM-landsliðnum. Styrkital hansara er 2643, og hann er í løtuni fjórðsterkastur í Onglandi.

Hvussu ofta hann verður at síggja í føroysku kappingini er so spurningurin. Altjóða meistarin John Arni Nilssen hevur í nøkur ár staðið á listanum hjá Sandavágs Talvfelag, men hevur vist bara telvað ein dyst við teimum. Gawain Jones var við í onkrari av altjóða talvkappingunum, ið nevndust "Faroes Open", sum vágamenn og kollfirðingar fyri nøkrum árum síðani skipaðu fyri í Føroyum, tí er helst vinskapur íkomin millum vágamenn og enska stórmeistaran.

Fyrstu trý umførini verða telvað í heyst; í dag, næsta sunnudag og 9. november. Eftir tað fer landsliðið til Kýprós í kappingina fyri smátjóðir í Evropa. So verður steðgur í føroysku kappingini til eftir nýggjár. Tá verða hini sjey umførini telvað til 14. mars, tá landskappingin endar.