Almannaveitingar verða javnaðar 2,7 prosent næsta ár

Javningarprosentið til almannaveitingar næsta ár verður 2,71, boðar Almanna- og mentamálaráðið frá.

Í ár er javningarprosentið 3,6.

Í fjør var javningarprosentið 3,8, sum var nakað meira enn undanfarin ár.

Javningarprosentið er árliga prosenttalið, sum flest allar almennar veitingar og pensjónir skulu javnast eftir.

Javningarprosentið verður útroknað sum miðaltalið av prosentvísu broytingini í lønarkarminum hjá Fíggjarmálaráðnum í tólv mánaða skeiðnum, sum endaði 1.oktober, og prosentvísu broytingini í brúkaraprístalinum annan ársfjórðing í ár sammett við annan ársfjórðing í fjør.