Dagføra dagstovnalógina frá 2000

Lógin um dagstovnar og dagrøkt, sum frá 2000, er dagførd. Uppskotið er til hoyringar, til 5. januar.

Fimm høvuðsbroytingar eru.

Ábyrgdarbýtið verður nágreinað, so tað er púra greitt, hvør hevur fakliga og fyrisitingarliga ábyrgd.

Ein samstarvsnevnd hjá landi og kommunum skal samskipa menning á økinum.

Tilboðini í lógini eru greitt avmarkað. 

Lógin fevnir um dagrøkt, vøggustovu, barnagarð og frítíðarstovnar til í minsta lagi annan flokk

Kunnu hava stongt í fimm vikur

Reglurnar um upplatingartíð vera greiðari. Til ber at hava stongt upp til fimm vikur um árið.

Kommunur skulu lata námsfrøðiliga ráðgeving.

Landið letur sernámsfrøðiliga ráðgeving, tá serligur fakligur tørvur er á henni.

Barna- og Útbúgvingarmálaráðið hevur gjørt dagføringarnar í lógini í tøttum samstarvi við Kommunufelagið.

Samanumtikið skulu broytingarnar í lógini gera ábyrgdarbýtið millum land og kommunur greiðari og avmarka nágreiniliga, hvørji tilboð og aldursbólkar lógin er um.   

Tær skulu seta felags karmar um námsfrøðiliga og sernámsfrøðiliga ráðgeving.