Álitið millum Grønland og USA skal byggjast uppaftur

- Álitið skal byggjast upp aftur.

Tað sigur grønlendska landsstýriskvinnan í uttanríkismálum, Vivian Motzfeldt, á tíðindafundi í dag, um viðurskiftini millum Grønland og USA. 

Amerikanski sendiharrin í Danmark, Ken Howery, var eisini við á tíðindafundinum.

Tað skrivar grønlendski miðilin, Sermitsiaq.

- Í 80 ár hava vit samstarvað við USA. Vit hava tørv á, at álitið verður bygt upp aftur, soleiðis at góða samstarvið kann halda fram, segði Vivian Motzfeldt.

Elvt til ótryggleika

Amerikanski forsetin, Donald Trump, er fleiri ferðir komin við uppskotinum um, at USA eigur at eiga Grønland og hann hevur ikki víst aftur, at tað kann gerast við hernaðarligum valdi.

Tað hevur elvt til ótryggleika, sigur grønlendska landsstýriskvinnan í uttanríkismálum.

- Av teirri orsøk er tað neyðugt, at vit kunnu tosa opið um hesi evni. Eg vil draga fram, at land okkara hevur eitt tætt samstarv við USA og útlitini fyri samstarvi og sambandi í framtíðini eru góð, segði hon.