Fiskiveiðusamráðingar halda fram í næstu viku

Fiskiveiðusamráðingarnar millum Føroyar og Russland eru steðgaðar fyri fyrst, og partarnir hava avtalað at hittast aftur 29. desember við tí máli, at fáa eina avtalu í lag.

Tað skrivar landsstýrismaðurin í tilfeingis- og vinnumálum, Eirikur í Jákupsstovu, í skrivligum boðum seinnapartin.

Samráðingar hava verið í gjár og í dag, og tær eru á talgildum palli.

Landsstýrismaðurin sigur, at samráðingarnar hava gingið væl. 

- Tað gongur altíð seinni, tá samráðingar eru á talgildum palli, skrivar hann.

Seinastu árini hava hesar samráðingarnar tikið millum 4 til 5 dagar, og higartil hesa ferð eru tveir dagar brúktir. 

Týsdagin, 29. desember, hittast partarnir aftur, og tá er málið at fáa avtalu í lag.

Samráðingar millum Føroyar og Noreg um sínámillum fiskiveiðirættindi fyri 2026 vóru fríggjadagin, 19. desembur, og tær vóru eisini á talgildum palli.

Í gjár gjørdu Føroyar og Bretland semju um fiskirættindi fyri 2026.

Semjan fyri 2026 er gjørd eftir sama leisti sum undanfarin ár, tó at nakrar tillagingar eru gjørdar, skrivar tilfeingis- og vinnumálaráðið.