Stúrir fyri Barentshavinum og uppsjóvarvinnuni

Í dag hevur Føroya Skipara- og Navigatørfelag havt aðalfund á Hotel Hilton í Havn. Annfinnur Garðalíð, formaður, stúrir fyri hvussu verður í Barentshavinum og fyri niðurskurðinum í uppsjóvarvinnuni.

Nýggj nevnd skal veljast í dag, og stríðsval er um at sleppa í nevndina. Fundurin, sum byrjaði fyrrapartin, er niðurlagdur meðan atkvøðurnar verða taldar.

Fyrrapartin fekk Kringvarpið orðið á Annfinn Garðalíð, formann í Skipara- og navigatørfelagnum.

Um farna árið nevnir hann m.a. Galaxy-málið, sum hevur fylt nógv eina tíð. Annars kann hann ikki koma inn á so nógv onnur mál, tí tey eru persónsmál.

Spurdur, hvørjar størstu avbjóðingar eru í løtuni, vísir hann til støðuna í Barentshavinum, og niðurskurin av kvotum í uppisjóvarvinnuni. 

Stríðsval at sleppa í nevndina
Størsti spenningurin á sjálvum fundinum var nevndarvalið, tí fimmm nevndarsessir skuldu veljast, og seks valevni stillaðu upp.

Seinrapartin hevur Føroya skipara- og navigatørfelag boðað frá, at Jørgen Thomsen og Petur Mohr eru nývaldir í nevndina. Elias Zachariasen, Alfred Jacobsen og Jákup Gøthe blivu endurvaldir.

Hinir nevndarlimirnir eru Annfinnur Garðalíð, Martin Mohr í Grund, Kristian Oskar Henriksen, Jónfinn Poulsen og Arnfinn Hansen.

Hoyr annars samrøðuna við Annfinn Garðalíð, formann í Føroya skipara- og navigatørfelag niðanfyri.