Føroyar í formansskapi

Í gjár tóku Danmark og Føroyar við formansskapinum í Norðurlendska ráðharraráðnum.

Føroyar og Danmark fara serliga at leggja dent á samfelagstrygd og tilbúgving, kappingarføri og javnsetta luttøku í norðurlendska samstarvinum fyri Føroyar, Grønland og Áland, skrivar landsstýrið.

Sum liður í formansskapinum vera Føroyar í ár vertir fyri meira enn 20 fundum, bæði á ráðharrastigi og á embætisfólkastigi. 

Árligi summarfundurin hjá norðurlendsku samstarvsráðharrunum verður í Føroyum 15. og 16. juni.

Fundurin verður um samfelagstrygd og tilbúgving.