Privat skulu fyrireika munnarnar

Landsverk ætlar fyrst at bjóða arbeiðið út at gera økið kring bergholsmunnarnar til privatar fyritøkur, áðrenn tunnilsliðið hjá Landsverki kann byrja upp á bergholið til Tjørnuvíkar.

Sjálvt bergholið er liðugt fyrireikað. 

Tað sigur Ruth Vang, landsstýriskvinna, í svari til Henrik Old, løgtingsmann.

Útgerðin hjá tunnilstoyminum er á maskinstøðini í Sundum og aðrastaðni.

Og nakað verður enn brúkt í bergholinum til Dals.

Útgerðin verður flutt, tá byggiplássið við Marmaskallará norðan fyri Víkarnes við Haldarsvík er klárt.

300 milliónir

Bergholið til Tjørnuvíkar var í oktober í fjør mett at kosta 200 mió. kr., um tunnilsliðið borar.

Aftrat tí koma 50 milliónir til vegarbeiði og 50 milliónir í váðaískoyti.

Politisk støða má takast til, hvussu verkætlanin verður raðfest í langtíðarløguætlanini, áðrenn farið verður í gongd við arbeiðið.

Í ár eru settar av 12 mió. kr.

10 milliónir skulu setast av í 2027 og 10 milliónir í 2028.

Men fyri at hava eina skilagóða arbeiðsgongd metir Landsverk, at neyðugt verður at játta 30 til 40 mió.kr. um árið, sigur Ruth Vang.