Gera forkanning um vitlíki hjá tí almenna

Ein forkanning um vitlíki hjá tí almenna verður liðug í februar.

Hetta er ein støðulýsing. Síðani skal gerast ein heildarætlan.

Gjaldstovan ger forkanningina og heildarætlanina saman við Fíggjarmálaráðnum.

Tað sigur Ruth Vang, landsstýriskvinna, í svari til Una Holm Johannesen, løgtingsmann.

Endamálið við heildarætlanini er at lýsa, hvussu vit í Føroyum gagnnýta vitlíki á bestan hátt.

Tað skal kunna loysa haldførisavbjóðingar, styrkja kappingarførið og varðveita og styrkja føroyska málið. 

Kostar eina millión

Men fyrst skulu pengarnir finnast. Heildarætlanin kostar eina millión.

Fáast pengarnir nú, kann heildarætlanin vera liðug og almannakunngjørd í ár, sigur landsstýriskvinnan.

Eitt endamál er, at vitlíkitøkni skal skilja og tosa føroyskt. 

Eingin veit, hvussu nógv tað almenna brúkar vitlíki.

Gjaldstovan veit tó, at onkrir almennir stovnar eru í gongd við verkætlanir um at gagnnýta vitlíki.