Frá barnafjasi til lívlangan kærleika

Hóast tey bert eru 40 og 37 ára gomul, hava Anja Klæmintsdóttir Jacobsen og Sam Jacobsen longu deilt lívið í trý áratíggju.

Tá Sam var sjey ára gamal, hugsaði hann kanska ikki nógv um gentur, men tað var Anja, sum fyrst fekk eitt gott eyga á fitta drongin í grannalagnum. Tey spældu nógv saman sum børn, og vinalagið var altíð gott.

Tað hevur í grundini altíð verið Sam og Anja. Tað byrjaði sum barnafjas, og til ein føðingardag fekk Sam eitt bræv í hondina frá einari vinkonu. Boðskapurin var einfaldur: "Vilt tú vera par? Ja ella nei".

Sam setti kross við "ja", og sum prógv um kærleikan fekk hann eina hálsketu við einum hálvum hjarta, sum Anja hevði keypt í Rokoko. Hina helvtina bar hon sjálv.

Nøkur ár seinni, tá Anja fór at ganga í framhaldsdeild í Fuglafirði, kom ein lítil steðgur í sambandið. Steðgurin var stuttur - frá 29. juli til 29. september - og Anja minnist enn neyvu dagfestingina. Men tá tey funnu saman aftur, var tað við størri álvara.

Tey fluttu seg úr barnafjasinum og inn í tann vaksna kærleikan. Ein dagin tók Sam í hondina á Anju, og tey fóru ein túr til gongu í Syðrugøtu. Tey løgdu seg niður á vegin tætt við spæliplássið, og júst tá fór eitt stjørnuskot um himmalhválvið. Tað var løtan, har tey bæði kendu á sær, at hetta var tað rætta.

Síðan tá hava tey verið ósundurskiljandi. Í dag eru Anja og Sam gift og eiga seks børn saman.

Morgunsendingin vitjaði parið í Norðragøtu til eitt prát um kærleika, tolsemi og lívið saman í 30 ár.

Øll samrøðan kann hoyrast her: