VIDEO: Elias og teir bastu suverena oddaliðnum

Elias Ellefsen á Skipagøtu og Kiel fingu ein kærkomnan sigur í oddastríðnum í Bundesliguni, tá teir vunnu á suverena oddaliðnum Magdeburg, sum ikki hevði tapt í landskappingini fyrr enn í dag.

Føroyski spælskiparin skeyt trý mál og legði upp til fýra í 31-29 heimasigrinum, sum ger, at stríðið um plássini í toppinum harðnar. 

Magdeburg var frammanfyri stóran part av fyrra hálvleiki og eina løtu eftir steðgin, áðrenn heimaliðið yvirhálaði við góðum verju- og málmansspæli frá Gonzalo Perez de Vargas.

Eisini kom glið á álopsspælið, har føroyski spælskiparin ofta var í miðdeplinum. Umframt málini og uppleggini vann hann eisini Kiel trý brotskøst.

Í Max-Schmeling-Halle í týska høvuðsstaðnum hevði Füchse Berlin trupulleikar ímóti Stuttgart fyri steðgin, men fór undan í seinna hálvleiki og vann 37-32. Hákun West av Teigum spældi væl og skeyt fýra mál upp á fýra skotroyndir eftir steðgin.

Leygardagin vann liðið hjá Vilhelmi Poulsen, Hannover-Burgdorf, 30-25 á Wetzlar.

Magdeburg er framvegis fremst við 38 stigum, men niðanfyri liggja fleiri framvið eftir næstovasta plássinum, sum gevur Champions League-hondbólt næsta ár. Füchse Berlin er í løtuni á 2. plássið við 34 stigum, Flensburg hevur 33 frammanfyri Lemgo og Kiel, sum hava 32 stig í part.

Hannover-Burgdorf hava spælt seg upp á 9. pláss við 22 stigum.