Ingilín Strøm gevst í politikki

- Eftir seks og eitt hálvt ár í føroyskum politikki, so taka eg nú ein steðg frá politikki, skrivar Ingilín D. Strøm á sínum Facebook-vanga.

Hon sigur, at hon ongantíð ætlaði sær at vera livibreyðspolitikari, men fer framvegis at arbeiða fyri sínum hjartamálum, nú hon hevur fingið starv hjá Amnesty Føroyum, samstundis sum hon fer at lesa master í professionellum samskifti.

- Hjartamálini vóru - og eru framvegis - umhvørvi, javnstøða, rættvísi og eitt samfelag við somu møguleikum fyri øll. Eg eri framvegis javnaðarfólk og takki fyri stuðulin, skrivar Ingilín D. Strøm á Facebook. Hon vil ikki gera samrøðu við Kringvarpið.

Atkvøðuslúkur

Ingilín D. Strøm stillaði fyrstu ferð upp til løgtingið í 2019, og fekk tá næstflestar atkvøður - 546 atkvøður. Á seinasta løgtingsvali, í desember 2022, fekk hon eisini næstflestar atkvøður - 787 persónligar atkvøður.

Vit høvdu ætlað at fingið eina viðmerking frá formanninum í Javnaðarflokkinum, Aksel V. Johannesen, men hann er upptikin, sigur hann. 

Í stuttari viðmerking skrivar hann, at "tað er sjálvandi keðiligt, at Ingilín Didriksen Strøm ikki stillar upp til løgtingsvalið, men tað er hennara avgerð, og tað havi eg stóra virðing fyri", skrivar Aksel V. Johannesen í sms-boðum til útvarpið.