TIME: PAZ og Ress Spa eru millum 100 tey bestu støðini í heiminum at vitja

Amerikanska tíðarritið, Time's Magazine, hevur valt Ress Spa og matstovuna PAZ at vera millum 100 tey bestu støðini í heiminum at vitja í ár.

PAZ matstovan lat upp í fjør og fekk tá tvær Michelin-stjørnur. 

- Tað hevur gingið skjótari enn væntað, sigur høvuðskokkurin og eigarin.

PAZ

Tíðarritið TIME'S skrivar, at PAZ vil vísa, at spennandi norðurlendskur matur, ikki bara er í Keypmannahavn, men eisini longur norðuri.

Føroyskur matur og føroysk matmentan er serstøk samanborið við onnur Norðurlond.

Serligar og nýskapandi upplivingar

TIME velur støð kring allan heim, sum tey meta bjóða serligar og nýskapandi upplivingar innan ferðavinnu, mentan, matstovur og hotell. Listin verður gjørdur í samstarvi við tíðindafólk kring allan heim.

At Ress nú er komið á listan verður mett sum ein stór altjóða viðurkenning - bæði fyri spa’ið sjálvt og fyri føroysku ferðavinnuna sum heild, skrivar Hotel Føroyar í tíðindaskrivi. 

“Vit í Ress og á Hotel Føroyum eru bæði errin og takksom fyri viðurkenningina frá TIME. At vera vald sum eitt av ‘World’s Greatest Places 2026’ er ein stórur heiður og ein staðfesting av arbeiðinum, sum er lagt í at skapa eina serstaka vælveruuppliving í Føroyum,” sigur Súsanna í Stórustovu, leiðari í Ress.

Ress Spa