$elfie verður aftur at síggja í bestu senditíð

Skemtirøðin $elfie er nú aftur á skíggjanum við nýggjari sesong. 

Vit halda fram har, sum seinasta sesong endaði. Eftir at Pauli gjørdist eitt kent andlit á netinum, hevur PaulE fingið fleiri fylgjarar og størri ambisjónir. Hann vil meira. Røkka longri. Gerast størri. Men spurningurin er, hvussu langt hann er til reiðar at fara og fyri hvønn prís?  

LES EISINI: $elfie – nýggj føroysk skemtirøð á veg 

Í nýggju sesongini fer hann undir samstørv og tekur av møguleikum, sum skjótt vísa seg at vera meira vandamiklir enn væntað. Hann siktar høgt, kanska ov høgt, og tá hann snávar, er fallið bæði hart og sjónligt. 

PaulE, $elfie, Jákup Dahl

 
Hesa ferð skal PaulE millum annað halda ein fyrilestur fyri ungdóminum á Glasir.

Pauli skal framhaldandi fóta sær í nýggjari tilveru við hjúnaskilnaði, foreldraleikluti og einum gerandisdegi, har skermar og sosialir miðlar fylla meira enn nakrantíð. 

Tað, sum serliga eyðkennir hesa sesongina, er, at støðurnar, sum Pauli kemur í, gerast alsamt meira ógvusligar og skelkandi. Tað verður eisini varpað ljós á tær meira sárbæru avleiðingarnar av at deila sítt lív á sosialu miðlunum, og hvussu stóra skermnýtslan ávirkar okkum øll. 

PaulE, $elfie, Jákup Dahl

Pauli og ekskonan skulu eisini til foreldrafund, har okkurt nýtt kemur undan kavi.

Fyrsti partur av fýra verður frumsýndur í sjónvarpinum og á heimasíðuni hjá Kringvarpinum fríggjakvøldið 17. apríl beint eftir Dag og viku. 

Longu nú ber til at fylgja PaulE á Instagram-vanganum @selfiepaule, og síggja fyrstu sesong av $elfie.