Sær lovandi út fyri Sjálvstýri

Ein av teimum stóru spurningunum á løgtingsvalinum í dag er, um Sjálvstýri fær umboð á tingi ella ikki. Flokkurin er meiri enn aldargamal, tí tað var býtið millum Sambandsflokkin og Sjálvstýrisflokkin, sum hann æt tá, sum var uppruning til politisku flokkskipanina, sum vit hava í Føroyum.

Men á løgtingsvalinum í 2022 datt Sjálvstýri út, og framtíðin hjá gamla flokkinum gjørdist óviss.

Helvtin av atkvøðunum taldar
Í løtuni er helvtin av atkvøðunum taldar upp, og Sjálvstýri stendur til at fáa 3,2 prosent av atkvøðunum. Tað er eitt vet meiri enn tey umleið 3 prosentini, sum skulu til fyri at koma upp um tinggáttina, sum tað eitur.

Tað, sum er eftir, kann sjálvandi broyta nógv, men í løtuni sær út til, at Sjálvstýri hevur ein veruligan møguleika at fáa umboð aftur á løgtingi.