Eirikur í løgtingið

Tað var sera tætt millum teir báðar fyrrverandi landsstýrismenninar hjá Tjóðveldi, tá úrslitið av løgtingsvalinum var greitt hóskvøldið.

Tá avtornaði dróg Jóhan Christiansen longra stráið, meðan Eirikur í Jákupsstovu stóð uttanfyri. Jóhan fekk 307 atkvøður og endaði nummar seks á listanum hjá Tjóðveldi. Eirikur fekk 304 atkvøður og endaði nummar sjey. Tjóðveldi fekk seks tingfólk vald. Men fínteljingin í kvøld vendir myndini á høvdið.

Eirikur í Jákupsstovu fær níggju atkvøður afturat, meðan Jóhan Christiansen fær tvær atkvøður afturat. Eirikur fær tí 313 atkvøður tilsamans, meðan Jóhan fær 309. Eirikur í Jákupsstovu er tí valdur á løgting.

-Talan er um atkvøður, sum eru bólkaðar skeivt. Okkurt valevni á listanum hjá Tjóðveldi hevði fingið nakrar atkvøður, sum annað valevni á sama vallista átti. Tí broytist myndin so nógv, sigur Malan Johansen, forkvinna í løgtingsvalnevndini.

Úrslitið av fínteljingini er endaligt, staðfestir Malan Johansen, sum í sama viðfangi harmast um at slík mistøk fáa stórar avleiðingar fyri einstøk valevni. Men løgtingsvalnevndin fær einki gjørt, annað enn at rættar teir feilir, sum blivu gjørdir í uppteljingini valkvøldið 26. mars.

Eirikur fyri Jóhan

Fyri teir báðar politikararnar á listanum hjá Tjóðveldi merkir fínteljingini, at annar fer út í politiska kuldan, men hin kemur inn í hitan.

-Eg havi júst fingið boðini, og tað er ikki heilt gingið upp fyri mær enn. Satt at siga eri eg eitt sindur paff, sigur Eirikur í Jákupsstovu.

Júst valdi løgtingsmaðurin hevði ikki væntað, at finteljingin skuldi lyfta hann inn um tinggáttina.

-Eg hevði meira trúð uppá eina samgongusamráðing, har Tjóðveldi kom í samgongu, og boð tískil vóru eftir mær at koma í tingið sum varamaður fyri onkran, ið fór í landsstýri, sigur Eirikur í Jákupsstovu.

Eirikur í Jákupsstovu og Jóhan Christiansen endaðu báðir í landsstýrinum, tá Tjóðveldi fyri einum ári síðani umskipaði manningina í landsstýrinum. Jóhan Christiansen var tá ikki partur av politisku skipanini, meðan Eirikur í Jákupsstovu var løgtingsmaður.

Endamálið við tí politisku avgerð var at styrkja Tjóðveldi uttan fyri høvuðsstaðin, ítøkiliga í norðurøkinum.

-Valúrslitið í síðstu viku staðfestir væl, at tað var ein røtt avgerð, tí vit báðir fingu eitt rímuliga gott løgtingsval hesaferð. Men í kvøld føli eg við Jóhan, sum fyrst var innanfyri, og nú brádliga er uttanfyri tinggáttina, sigur Eirikur í Jákupsstovu.

Møguleikin hjá Jóhan Christiansen at gerast tingmaður er nú treytaður av, at Tjóðveldi kemur í samgongu.

Eingin broyting á Sambandslistanum

Fínteljingin í kvøld hevur ikki aðrar broytingar við sær. Einasta ivamál var, um fínteljingin kundi broyta nakað á listanum hjá Sambandsflokkinum. Johan Dahl fekk 345 atkvøður og kom júst inn um tinggáttina, meðan Magni Højgaard gjørdist akkurát ov stuttur við 342 atkvøðum. Fínteljingin í kvøld gav Johan Dahl eina atkvøðu afturat, og hann varðveitir tískil sín tingsess.

Magni Højgaard kann tó gerast tingmaður, um Sambandsflokkurin kemur í samgongu.