Føroyingar eru feitir, roykja ov nógv og eru strongdir

Størstu hóttanirnar móti heilsuni hjá føroyingum í dag eru fiti, royking og strongd.

Tað sigur stjórin í Heilsustýrinum, Noomi Oddmarsdóttir Gregersen. Hetta ger hon í sambandi við, at tað í dag, 7. apríl, er almennur heilsudagur sambært ST.

Sum heild liva føroyingar væl, um hugt verður at fólkaheilsukanningini, sum varð gjørd í 2023, tí har søgdu 87 prosent av føroyingum seg hava góða heilsu.

Men har eru ávísir vandar, sum gera okkara heilsu verri. 

Noomi O. Gregersen, Noomi Oddmarsdóttir Gregersen, Heilsustýrið

- Vektin hjá føronygum veksur fyri hvørja kanning, sum vit hava gjørt. Og tað blíva alsamt fleiri, sum liva við yvirvekt. Tað er ein trupulleiki, tí ymiskar sjúkur kunnu standast av yvirvekt, sigur Noomi Oddmarsdóttir Gregersen.

Umframt ovurfiti er royking eisini framvegis ein trupulleiki hjá føroyingum.

- Kanningin frá 2023 vísir, at 18 prosent av føroyingum roykja dagliga. Í londum rundan um okkum er hetta talið nógv lægri, so her hava vit eina avbjóðing, staðfestir stjórin í Heilsustýrinum.

Eisini strongd hóttir heilsuna hjá føroyingum í dag.

- Tað eru serliga ungar kvinnur í aldursbólkinum 18-24 ár, sum siga seg vera strongdar. Orsøkirnar eru fleiri, men eitt nú krøv frá samfelagnum og nógvu valmøguleikarnir gera, at ungu kvinnurnar merkja strongd, sigur Noomi Oddmarsdóttir Gregersen.

Í morgunsendingini forklárar stjórin í Heilsustýrinum um heilsustøðuna hjá føroyingum.