Borg verður størstur á timburhandilsmarknaðinum

P/f Borg hevur gjørt avtalu um at keypa Sandavágs Timburhandil. Verður avtalan góðkend av Kappingareftirlitinum, verður Borg nógv størsta felagið á føroyska timburhandilsmarknaðinum.

Í fjør høvdu Borg og Sandavágs Timburhandil tilsamans 114 starvsfólk. Til samanberingar hevði størsti kappingarneytin, Bygma Balslev, 80 starvsfólk.

Borg er vaksið nógv seinastu árini. Í 2007 vórðu Højgaards Handilsvirki, Klaksvíkar Timburhandil og Klement Petersen savnað undir navninum Borg. Síðani keypti felagið eisini Havnar Timburhandil í 2018.

Nú stendur so Sandavágs Timburhandil fyri tørni, men keypið er treytað av góðkenning frá Kappingareftirlitinum.

Stjórin í P/f Borg, Rodmund Nielsen, vil ikki at gera samrøðu við Kringvarpið í dag, tí øll skjøl enn ikki eru latin inn í málinum.