Serlig tingnevnd viðger starvsheiti hjá løgtings- og landsstýrisfólkum

Løgtingið valdi í gjár eina grein 25-nevnd at viðgera uppskotið hjá formansskapinum um at broyta stýrisskipanarlógina.

Allir flokkar hava fólk í nevndini.

Í nevndini eru Johan Dahl, Sunnvá Dahl Høgfeldt, Elsebeth Mercedis Gunnleygsdóttir, Jóhannis Joensen, Hervør Pálsdóttir, Bjarni K. Petersen, Steffan Klein Poulsen og Sámal Petur í Grund. 

Johan Dahl, løgtingsformaður, er formaður í grein 25-nevndini.

Løgtingið samtykti í 2023 at broyta stýriskipanina, so hon verður kynsóheft.

Tað er, at farið verður frá orðinum maður í øllum viðurskiftum, til at tosa um kvinnu og mann ella um fólk. 

Broytingin er komin aftur í tingið nú, tí tvey løgting skulu góðkenna broytingar í stýrisskipanarlógini.