Óegnaðir at búgva í

Nú skulu øll, sum búgva í Eirargarði 4, 6 og 8, endurhýsast.

Teir tríggir íbúðablokkarnir eru í so ringum standi, at ikki loysir seg at høvuðsumvæla teir. 

Tað sigur ein kanning, sum Landsbyggifelagið gjørdi fyri Landsverk.

Ráðgevingarfyritøkan Spenn hevur eisini gjørt eina meting.

Heilsu- og Orkumálaráðið og Landsverk eru farin undir trý ára tilgongd við endurhýsing.

Farið er longu undir arbeiðið at finna aðrar bústaðir, millum annað við at fyrireika nýbygging við Heygsvegin.

Vantandi viðlíkahald

Niðurstøðan í kanningini hjá Landsbyggifelagnum er, at slit, vantandi viðíkahald og broytt krøv gera, at bygningarnir ikki longur lúka krøvini, sum nú eru.

Í íbúðablokkunum búgva heilsustarvsfólk, eisini tey, sum koma til Føroya í styttri ella longri tíðarskeið, og fólk, sum koma til Havnar í heilsuørindum.

Arbeiði at kanna allar hinar bygningarnar á økinum er byrjað.

Og abeiðið at tryggja brunaviðurskiftini fer í gongd alt fyri eitt.

Á Eirargarði 4,6 og 8 eru 115 bústaðir, 42 kømur og 73 íbúðir. 

Tó vera vanliga bara millum 60 og 70 teirra brúkt í senn.