Umsóknarfreistin til forstjórastarvið fer um eina viku

Um eina góða viku fer freistin at søkja starvið sum forstjóri í Sjúkrahúsverkinum og sjúkrahússtjóri á Landssjúkrahúsinum.

Umsóknarfreistin er 21. mai.

Sjúkrahúsverkið umfatar Landssjúkrahúsið, Klaksvíkar Sjúkrahús, Suðuroyar Sjúkrahús og Sjúklingahotellið í Keypmannahavn. 

Har eru 169 sengur, 1.200 ársverk, og raksturin kostar 1,2 milliardir krónur um árið. 

12.000 innleggingar

Í Sjúkrahúsverkinum eru 12.000 innleggingar um árið, 130.000 ambulantar viðgerðir, 5.000 skurðviðgerðir og 1.900 sjúklingar eru í viðgerð uttanlands.

Starvið er áramálssett í fimm ár við møguleika fyri at fáa tað longt í trý ár.

Starvið verður sett sum skjótast ella eftir nærri avtalu.

Steinar Eirikstoft gavst sum sjúkrahússtjóri í Landssjúkrahúsinum og forstjóri 1. desember í fjør. 

Síðan hevur Per Busk verið virkandi stjóri.