Advokatur: Er rein populisma at herða revsingina fyri brot á rúsevnislogina

Revsingin í Føroyum er longu væl hægri enn í grannalondum okkara, tá tað snýr seg um brot á lógina um rúsevnir, sigur Jógvan Páll Lassen, advokatur.

Hann vísur eisini á, at tað at herða revsingina fer at verða steinur omaná byrðu hjá ungum føroyingum, sum stríðast við rúsevnismisnýtslu. Kortini heldur hann, at tað hevur týdning at herða revsingina tá tað snýr seg um kriminell bakfólk, sum skipa fyri innflutningi av rúsevnum.

Í 2022 var ein Heildarætlan um at fyribyrgja og tálma rúsevnismisnýtslu handað táverandi løgmanni, Bárði á Steig Nielsen, sum nú er landsstýrismaður og varaløgmaður. Talan var um eitt stórt arbeiði har fleiri enn 70 hoyringspartar vóru tiknir við. 

Arbeiðsbólkurin hevði nógv tilmæli um trivnað, sunnar felagskapir og um at leggja størri orku í at menna og samskipa tilboðini til teirra, sum hava sálarligar ella sosialar avbjóðingar, fyri at fyribyrgja langtíðartrupulleikum og rúsevnistrupulleikum.

Undir harðari revsing í Føroyum stendur skrivað í Heildartilmælinum, at:

"Tað tykist í høvuðsheitum at vera semja millum teir bólkar sum hava tætt samband við fólk við rúsevnistrupulleikum, at revsing í sjálvum sær ikki er besta loysnin, um ætlanin er at fyribyrgj rúsevnismisnýtslu og innflutningi av rúsevnum í Føroyum. Tað er væl hugsandi, at viðgerðardómar saman við einum mentornetverki høvdu givið betri úrslit - bæði fyri borgaran og samfelagið sum heild - serliga tá ið talan er um smærri rúsevnismál."