Grønlendingar mótmæla: Vit eru ikki til sølu

Mótmælisgonga var í Nuuk í gjár í sambandi við, at USA læt upp konsulat í nýggjum hølum í grønlendska høvuðsstaðnum.

Sambært grønlendska miðlinum Sermitsiaq vóru umleið 500 fólk við í mótmælisgonguni, sum hevði til endamáls at siga USA, at Grønland ikki er til sølu.

- Tað er huvekjandi, at USA, sum í ár hátíðarheldur tjóðardag nummar 250 í røðini, ætlar at keypa Grønland. Vit eru eitt demokratiskt land, sum í longdini vil hava fullveldi, segði Aqqalukkuluk Fotain, sum skipaði fyri mótmælisgonguni, í røðu síni uttan fyri konsulátið.

Hann bað amerikonsku myndugleikarnar lurta eftir grønlendingum.

Grønland, mótmæli í Grønlandi

Ikki til sølu

- Vit eru ikki til sølu, og vit eru ikki eitt hernaðarligt objekt. Vit eru eitt fólk í einum samfelag, í einum heimi. Vit góðtaka ikki hóttanir úr USA. Um USA trýr uppá sjálvbjargni og sjálvsavgerðarrætt, so skilja tey okkara ynski. Fellur Grønland, kunnu øll onnur lond eisini falla. "Eitt nei er eitt nei", segði Aqqalukkuluk Fontain.

Løgreglan hevði sett vegforðingar upp fyri at tryggja økið, so mótmælisfólkini fingu frið fyri ferðsluni.

Grønland, mótmæli í Grønlandi

"Gevst so, USA"

Fólk gingu við grønlendska flagginum, sum eitur Erfalasorput, skeltum við mynd av Donald Trump og Jeffrey Epstein og slagorðinum "USA ASU", sum umsett til føroyskt merkir "Gevst so, USA".

Eisini vendu mótmælisfólkini amerikanska konsulatinum bakið og stóðu tigandi í tveir minuttir fyri at vísa sína ónøgd við atburðin hjá USA.

Tað var tó ikki bara uttan fyri konsulatið, at grønlendingar mótmæltu. Malene Vahl Rasmussen, borgarstjóri í Nuuk, var ein av gestunum, tá konsulátið skipaði fyri upplatingarmóttøku, og hon nýtti høvi til at geva Ken Howery, sendiharra, eitt mótmælisskriv. Aftaná fanst Malene Vahl Rasmussen at USA og segði, at soleiðis ber ein sameindur seg ikki at, og at borgararnir í Grønlandi stúra fyri, at land teirra verður yvirtikið av USA, skrivar Sermitsiaq.