Aron fer ongan veg – enn

Í gjár skrivaði Kringvarpið, at serbiska felagið FK Čukarički hevði bjóðað upp á føroyska U21-landsliðsspælaran Aron Benjaminsen. Í dag skrivar serbiski miðilin Telegraf, at áhugin var veruligur, men at felagið fyribils hevur slept ætlanini um at keypa føroyska bóltsnillingin.

– Felagið, sum er tiltikið fyri at fáa eygað á góðar spælarar og menna teir víðari, metti, at Aron Benjaminsen passaði væl til. Sjálvt um FK Čukarički tók stig til at keypa føroyska spælaran, so verður tað fyribils av ongum sambært okkara upplýsingum, skrivar Telegraf.

Aron Benjaminsen er uppvaksin í Skála og skifti í mars 2024 til Kristiansund í Noregi. Í ár kom hann aftur til føroyskan fótbólt. Hann gjørdi ein trý ára sáttmála í Sarpugerði og hevur seinastu dystirnar gjørt nógv vart við seg.

– Eg kann vátta, at tað er áhugi fyri honum, men eg kann ikki fara í smálutir. Vit hava gjørt ein trý ára sáttmála við Aron og vóna, at hann spælir í Víkingi í eina tíð afturat, segði formaðurin í Víkingi, Brandur Jacobsen, í gjár.

Bolt.fo skrivaði fyri kortum, at Viborg hevði verið og hugt eftir føroyska U21-landsliðsspælaranum. Víkingur hevur seinnu árini selt spælarar sum Gunnar Vatnhamar, Noah Mneney, Géza Dávid Turi og Poul Kallsberg. Tað er ikki óhugsandi, at Aron Benjaminsen verður tann næsti í røðini, men tað verður ikki beint nú.