Eingin samtykt um príseftirlit

Løgtingið samtykti ikki at stovna príseftirlit.

Løgtingið samtykti at geva Kappingareftirlitinum størri heimildir.

Kappingareftirlitið fekk eisini pengar til at seta fólk til burturav at gera marknaðarkanningar.

Kappingareftirlitið hevur støðugt marknaðareftirlit við marknaðum, sum hava týdning fyri fólk.

Um hetta arbeiðið longu nú hevur havt nakra ávirkan á kappingina ella prísgongdina, er ilt at siga. 

Ov tíðliga

Neyðugt er at fylgja einari gongd leingi, áðrenn niðurstøða kann gerast um árinið á kappingina ella prísgongdina.

Jacob Vestergaard, landsstýrismaður, hevur svarað Súsonnu Bertholdsen, løgtingskvinnu, sum spurdi um príseftirlit.

Hann sigur, at Kappingareftirlitið kann við kappingarlógini í hondini geva boð um at farast kann ikki upp um tilskilaðar prísir ella vinning.

Tað kann eisini krevja, at ávísir útrokningarhættir skulu nýtast, tá prísir ella vinningur vera roknaðir.

Sum frá líður ber betur til at siga, um heimildirnar hjá Kappingareftirlitinum virka eftir ætlan, sigur Jacob Vestergaard, landsstýrismaður.